Sta pagina la xe stà trascrita, ma la gà ancora da vegner rileta.
– Avanti! La nona l'è sola...
– Permesso?... – La siora Costansa,
se degna ricevarme in stansa,
l'è drio che la scalda el cafè...
De soto la scufia de cola,
tri denti sassina el me nome;
me toca contarghe el par come
ghe son capitado tra i piè...
Me sbalio, me imbroio: Sicome...
Sicuro... Par caso... Gran chè!
Me toca contarghe: Son giusto
rivà col vapor da ste parte,
par farme timbrar de le carte
le fede1 da torme moier...
La vôi che la sia de me gusto,
nè magra, nè grassa, nè alta...
La vôi che la cora e la salta,
e morbida come el butier!...
(Me par che la Nina se esalta,
ghe sluse ne i oci el piaser).
- ↑ le fede: i certificati.