Sta pagina la xe stà trascrita, ma la gà ancora da vegner rileta.
COMPLIMENTI.
I to oci quando i sluse
i fa ciaro sensa lume;
i me alsa e i me conduse
su par aria come piume,
come piume in boca al vento
nel paese de l'argento....
Nel paese de l'argento
gh'è le case bele bianche;
– Scapa drento, scapa drento, –
che a viagiar ghe vol palanche!
Cissà quanti a andar fin là
quanti sachi gh'in vorà!
I cavei de seda s-cieta,
i par sguissi1 de sol caldo,
trati in volta da l'arieta
che vien zo dal Monte Baldo;
te gh'è in testa i cavei d'oro,
del paese del tesoro...
- ↑ sguissi: guizzi.