Sta pagina la xe stà trascrita, ma la gà ancora da vegner rileta.
EL MONTEBALDO
E LE MONTEBALDINE.
I.
Co i piè nel lago e co la testa sconta
fra le nebie che fuma a fiochi, a fiochi,
co una tempesta quasi sempre pronta
par fulminar le barche de i pitochi;
cargo de gobe, che finisse in ponta,
col fogo drento, che lo magna a tochi...
Quando la rabia nel çervel ghe monta,
tuta brontolamenti e tuta s-ciochi;1
e i boschi alti salta su de furia
soto i colpi de vento che li scuria,2
e no gh'è baito che se tegna saldo
e no gh'è fosso che no para un progno,
una note sveiandome da un sogno,
da la Ferara3 ò visto Monte Baldo!