- 40.
Le strade fa vergogna; l'Edilizia
xe in malóra; la Sanità la Anona
çerca sempre un'energica persona,
e intanto cresse i mali e la malizia.
Benefiçenza?... si!, ma la giustizia
çede al protezionismo. Se ga bona
finanza?... i ragionieri no ragiona,
e sul dò e dò fa quatro i se scaprizia.
Mai una spesa granda in preventivo
a resanar malani inveterái,
e 'l fio cresse, e 'l devien omo cativo.
Oh!; i tosi se fa bestie, trascurai
tuto el zorno...: eco un fondo produtivo
che andaría speso, e no s'impiega mai!
- 41.
Per esempio, vardè!: co' quei milioni
de le congregazion de Carità
e tuto el resto ch'ofre la çità,
pur tropo aumenta sempre i acatoni.
Ocór: l'Asilp de Maternità;
un despensario che forníssa boni
alimenti ai fioleti, e baraconi
dove s'unissa i tosi abandonà.
Senza pensieri o scuse, i genitori
dovaría guadagnarse, alora, el pan,
contenti ch'el sia fruto de sudori;
e, a quela scola, i fiói -― tegnui luntan
e da l'ozio, e dal zogo, e dai liquori ―
crescerà esempio al rico e a l'artesan.
