E con mi tuti in pena i cardinali
In sti zorni xè stai ch'el caro mato
Per el ziro de certi capitali
Fusse lontan per un afar privato;
I economisti tuti xè bocali
In confronto de lù: lo sà el mio stato
Quanto el zoga de scherma e de finezza
Cò de bezzi in erario gh'è scarsezza.
Peca un fià Brancadoro d'indolenza 4
Colpa in parte de fina tessitura,
E de l'abuso de la so semenza
Adorando el creator ne la creatura;
De grazie e de maniere quinta essenza,
No gh'è dona che possa restar dura
Le casca tute come peri gnochi
E Brancadoro el primo casca a tochi.
La rason de sto nome al Concistoro
L'ò publicada co gò dà el capelo,
L'ò chiamà fin d'alora Brancadoro
Per certa vogia nata da putelo
De brancar s'el podesse un saco d'oro
Che mai ghe acorda per disgrazia el cielo,
Ma se crepasse un barba ch'el gà a Zara
El branca certo, e un saco el me prepara.
Venimo ai nostri afari: el tempo trota
E se perdemo in buzzere per Dio,
Un cavalier ghè quà de fama nota
Diletante ai so tempi de da drio 5
El posto vaca de auditor de rota,
E calcolo facendo del so brio
Me par che un posto el sia degno d'un omo
Che à ben scartabelà del mondo el tomo.
Pagina:Poesie e satire di Pietro Buratti veneziano.pdf/119
Sta pagina la xe stà trascrita, ma la gà ancora da vegner rileta.