Che in principio de l'inverno
Co le reduce in paese
Procurar me pol sto terno
Un ricorso del Marchese.
Che l'è un Russo lasagnon
Ma che in fondo se ghe diol
El castigo, e la preson
Stà in arbitrio di chi vol,
Che de gloria monumento
Come in bloco in altri dì
El tornar tre mesi drento
No xè adesso più per mì.
Che compagni al dispiacer
Gò tre cari fantolini
La Madona, e la mugier
Che no sorbe che i mi nini.
E a dispeto de sti mali
Che gò dito, e go ridito
A copisti materiali
La consegna el manoscrito!
Per far presto per zimbelo
De mì povero merloto
Quatro scribi (giusto cielo!)
La gà cuor de meter soto.
Quatro scribi che xè in pratica
De spropositi al so banco
E che in drio fin de gramatica
Fala i versi o lassa in bianco.
Ne contento de sto tiro
Che la cresema ignorante
Perchè el furto vada in ziro
La propaga l'Elefante.
Pagina:Poesie e satire di Pietro Buratti veneziano.pdf/243
Sta pagina la xe stà trascrita, ma la gà ancora da vegner rileta.