El mio putel
|
Edission original: |
Augusto Levi, Versi in dialetto triestino, Trieste, Caprin, 1915 |
|
Fonte: |
| ← La mia putela | Edission e fonte ▼ | San Giusto → |
Benedeto putel, ogni matina
Ale zinque el se meti el sveiarin,
E fin le sete e meza el te mulina
Senza stancarse mai, grego e latin.
Po el va al ginasio; nol ga un gran talento
Ma el ga amor proprio e volontà de fero,
Ghe voio ben per questo e son contento
E, no lo nego, de quel fio mi spero.
Studia, studia bambin, sempre ghe digo,
Che el pan no manca a chi che ga studià,
Se no, te parlo ciaro, xe caligo,
Guai se te resti un mus come papà.
Mia moglie alora: — Dio, quel povareto
Ti lo tormenti de matina a sera,
No ti vedi che el studia, benedeto!
El me par magro, palido de cera.
Mi rido e ghe ripeto al mio putel:
Studia, e tua mama lassa che la canti,
Più sai che ti te meti nel zervel,
Più a sto mondo, fio mio, ti andarà avanti.
El putel studia assai, mi ve assicuro
Che pochi fioi ga tanta volontà,
Solo el tedesco ghe xe un osso duro,
E lo confesso proprio nol ghe va.
E xe davero un dispiazer per mi,
Se dopo tanto romperse la zuca,
Qualche volta el me vien tuto avilì
Perchè in tedesco el ga ciapà una cluca.