El portonier (1915)
|
Edission original: |
Augusto Levi, Versi in dialetto triestino, Trieste, Caprin, 1915 |
|
Fonte: |
| ← Tombola | Edission e fonte ▼ | Se presenta una serva → |
El portonier
Chi più felice xe del portonier,
Lu nela vita no ga zerti guai,
No ghe manca per bever el bicer,
E in quanto a afito nol lo paga mai.
Poco el lavora anca se el ga un mestier,
Ma de una cossa a lu' ghe importa assai:
De leger quando capita el postier
Le cartoline dei afituai.
Lu con gran poligana e muso roto
Ale serve ghe cava i passerini,
Tra la spuza de pipa nel casoto.
Lu conossi i segreti dela vita
A menadeo de tuti i sui inquilini,
Dal primo pian insina la sufita.