El terno de la sonambula
|
Edission original: |
Attilio Sarfatti, Le Rime Veneziane e Il Minuetto, Milano, Fratelli Treves Editori, 1892 |
|
Fonte: |
| ← XXV. El povaro barcarol | Edission e fonte ▼ | XXVII. Ala stazion → |
XXVI.
EL TERNO DE LA SONAMBULA
1
Son mi la bestia, l'asena son mi.
Comare mia, son proprio invelenada.
Andando a casa, giusto l'altro dì,
No incontro la sonambula per strada?
Vogio - ghe digo - un terno; ma de quei!...
Ela me dà tre numari i più bei.
Coro al caselo, spendo più che posso,
E aspeto el sabo co' la freve indosso.
2
El sabo xe vegnuo, ma el terno gnente;
Gaveva la fortuna e l'ò scalzada.
No me disè de no, che son furente,
Comare mia, son proprio sfortunada.
El terno gera bon; mi lo zogà
Per Venezia e a Torin i l'à cavà.
Go falà el sito, mostro d'un destin!
Ela me l'à dà çerto per Torin.