L'invito a Nina

EPUB

MOBI

PDF

RTF

TXT

Qualità del testo: sto testo el xe conpleto, ma el gà ancora da vegner rileto.

Attilio Sarfatti ― Rime veneziane ― Libro Secondo

VIII. L'invito a Nina

1892

Edission original:	Attilio Sarfatti, Le Rime Veneziane e Il Minuetto, Milano, Fratelli Treves Editori, 1892
Fonte:	Indice:Le Rime Veneziane e Il Minuetto.djvu

← VII. Fiori e amor

Edission e fonte ▼

IX. La bela fra le bele →

[p. 77 modifica]

VIII.

L'INVITO A NINA

Che gusto andar in gondola,
Co more el sol, do amanti!
Scordar del mondo i triboli,
4Scordar del mondo i pianti,
E confidar ai venti
Le so parole ardenti,
E pian pianin, non visti,
8Zurarse eterno amor!

Che gusto in quele tepide
Sere d'istà, co sluse
La luna, e zira in aria
12Mile armonìe confuse,
Per la laguna quieta
Goder la dolçe arieta,
Senza pensieri tristi,
16Senza dolori in cuor.

[p. 78 modifica]

Alora, alora, o candida
Nina, el viver xe belo,
Alora se desmentega
20La tera per el çielo,
E dondolai da l'onda
In estasi profonda,
Ne par n'incanto solo
24La tera el çielo el mar.

Vien, Nina, vien in gondola,
Lontan lontan andemo,
Dove l'aria xe limpida,
28Dove ne porta el remo.
Lontan, dove chi s'ama
Scorda sta vita grama,
E streti a brassacolo
32Liberi pol sognar.