La Verità e la Favola
|
Edission original: |
Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 6.djvu |
| Edission e fonte ▼ |
Stufa de star in pozzo,
Nua come Dio l'à fata,
La Verità s'è messa un dì a viazar.
Ostinada a voler per tanto tempo
5Viver là drento, e respirar quel'aria
Soteranea, mal sana, e no magnar
Che sansughe e lumaghe,
L'avea veramente
Cambià ciera e fatezze;
10La pareva a dretura
Un scheletro scampà de sepoltura.
Trovandola per strada
Zoveni e vechi se la fava a gambe;
Oe, no ghe gera un'anema
15Che ghe sporzesse un strazzo de gonèla
O un per de scarpe rote;
Nissun gh'à dito mai: vegnì, sorela,
Magnè un bocon, fermève qua sta note.
Gh'è passà un dì vicin per acidente
20La Favola, che giusto andava al fresco,
Ma vestia!... sì, minchioni!
Merli, fiori, penachi da zechin
Ghe fava su la testa baldachin;
E un andriè da gala
25Co le maneghe larghe e coa prolissa;
Sparso de fiori d'oro,
De perle, de brilanti,
Col sol de drio, co la luna davanti,
Ghe decorava tuta la persona,
30Che la pareva proprio una bissona:
Tuta roba za falsa, ma d'un brio,
D'un fogo, d'un splendor
Da lassarghe su i ochi. Co la vede
Quela mumia col sesso in confidenza,
35Co la la riconosse,
La fa tre passi indrio per la sorpresa:
Ti ti xe mia sorela, Verità?
Senza camisa? Cossa fastu là?
La ghe risponde: — Ti lo vedi ben,
40Son qua che me impetrisso;
Sarà un'ora che domando a chi passa
Una strazza, un fenil, tanto che possa
Coverzerme e dormir; tuti me scampa,
Fazzo a tuti paura. Ma l'è chiara
45Co le done xe vechie le à finìo
Fina d'esser più prossimo,
E grazia granda se i ghe dise, adio.
— Ti è per altro più zovene de mi
(Torna a dirghe la Favola) e pur tuti,
50No fazzo per lodarme, me riceve
In casa, me carezza, e so tratada
Per tuto da signora... ma, sorela,
Perchè te vien mo in testa de mostrar...
De diana! almanco tor
55Do fogie de figher. Nua per la strada?
Petete i to talenti,
Dove gastu el giudizio? Oh, basta, senti:
Femo negozio insieme... Vien mo qua,
Fichete drento, involzete
60Nel mio manto real, e a passi uguali
Caminemo d'acordo. Per el tagio
De le scarsele, o fora per le maneghe
De trato in trato ti à da far baossete;
I filosofi, i savj
65Che fin adesso t'à voltà le spale,
Vedendo che la Favola
No xe che'l scorzo de la Verità,
A brazza averte te riceverà;
E ti stessa dai richi e dai puteli,
70Soliti co i te vede a scampar via,
Ti sarà ben acolta in grazia mia.
Cussì servindo al gusto de ciascun
Divideremo el fruto,
Ti dei matezzi, mi de la rason,
75Passaremo per tuto,
E faremo, sorela, un figuron.