La cavalcata
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← El navigante | Edission e fonte ▼ | Un desiderio → |
Fra Paolo e fra Giocondo,
Do omeni de mondo,
Do frati capucini,
Che ligi al so istituto
5I viagiava a penini
Dapertuto,
Tornando da una gita
A Teracina
Co la so capucina,
10E co la vita,
Arivai su la sponda d'un russelo,
Che s'aveva ingrossà da un gran scravazzo,
Nè essendoghe batelo
I gera al punto de passarlo a sguazzo.
15A uno de sti ingrati lasagnoni,
Dei quali su la tera
Ghe n'è adesso dei miera
De milioni,
Che a caso s'à trovà
20Poco distante,
Vestio tanto galante
E tanto profumà,
Come se giusto alora
Da una scatola el fusse vegnù fora,
25Lasagna de mistier,
Ghe nasce el bel pensier
Per far bordelo
Su la sponda de andar de quel russelo,
E de dirghe a quei padri benedeti:
30— Za che le ze direti
A passar l'aqua per andar de là,
E che de là anca mi vorave andar,
Le prego de lassar
Per carità,
35Postochè no se trova barca pronta,
Su la schena a un de ele che ghe monta.
Alora fra Giocondo
Co gran tranquilità da furbo vero
Fingendose più tondo
40De fra Piero,
El ghe dise — se star la sà a cavalo
La monta pur su mi,
Che l'assicuro un pi
No meto in falo.—
45Risponde quel bufon:
— Per dir la verità
Sul cavalo no son
Tanto amaestrà,
Ma su l'aseno, padre benedeto,
50So a cavalcar proveto —
E fra Giocondo — dunque la me monta,
Che la schena ze pronta. —
El ze za a cavatoto,
El va de troto,
55Ma in mezzo del russelo
Se ferma sul più belo
Disendoghe — la diga
De grazia cara ela
Avanti che finissa la fadiga,
60Gala soldi in scarsela? —
El gonzo che s'aveva imaginà,
Che per esser pagà
Fra Giocondo facesse sta domanda,
El ghe risponde imbota
65— Quanti che la comanda
Se la trota —
Misericordia! alora el capucin
l'esclama — mi meschin,
Per la mia religion
70Portar no posso
Senza aver permission
Danari adosso; —
Nè apena ste parole à pronunzià,
Che in pratica metendo el so progeto
75L'amigo in mezzo l'aqua à calumà,
E col padre compagno à tirà dreto;
Quando po che l'è stà
Da la banda de là,
Tolendolo perman
80Ga dito — cortesan,
La se vada a sugar,
E i aseni la impara a cavalcar. —
Per castigar i arditi
Adesso ocoraria che fra Giocondo
85Ghe fusse in tuti i siti
De sto mondo.