La marantega
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← Le squinzie | Edission e fonte ▼ | El zerbinoto → |
— Mo chi xela sta grima in capelon
Che va da i frati a far la penitenza,
Che par saltada fora dal casson
Dei strafanizzi per la Previdenza?
Co la ve mostra quel bruto mustazzo
La par l'ira de Dio depenta a sguazzo,
— Come? No cognosseu dona Catina,
Quela che sgoba come una massera,
Che scoa, che frega, e po la va in cusina
A conzar2 la pignata e la caldiera,
E che biastema pezo dei danai
Se no i ghe lava in ordene i bocai?
No son paron d’andar a la fenestra
Senza vederla bagolar su e zoso
Tanagiando3 e facendo la maestra,
Tirandoghe le recie a qualche toso;
Senza sentir sto fulmine de dona
Che sbragia, che strapazza o che bastona.
La scufia in testa e la traversa al fianco,
Piena de ciave come un carcerier,
La va in cantina, la ve sta drio 'l banco,
La furega ne l’orto e nel graner;
E per tenderghe megio al so interesse
La mete su i mustaci e le braghesse.
Se da un vecio schenal de pano zalo
La ve fa saltar fora un veladon,
E i dindi che la ciapa de regalo
La li mete in comercio de scondon,
Capirè che a poderla praticar
Ghe sarave del belo da imparar.
L’impresta soldi al sedese per cento
Tolendo in pegno anei de matrimonio,
Possae, recini e tatare d’argento,
Reliquie de San Marco e Sant’Antonio;
E fufignando4 megio che la pol,
La dà ponti a l’avaro e al strazzarol.
Ma co se zuna5 e co se bate 'l peto,
E se ciapa ogni dì la santa messa,
Co se ghe manda al papa l'oboleto
E i strucoli de pomi a la badessa,
Basta pagarghe al portiner el goto,
Che s'entra in paradiso a scopeloto.
- Note