La zuca
|
Edission original: |
Collezione delle migliori opere scritte in dialetto veneziano, Volume quinto: Ditirambi di diversi autori, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 5.djvu |
| Edission e fonte ▼ |
LA ZUCA
DITIRAMBO
DEL CO. AB.
MARC'ANTONIO CAVANIS
Quanto è vario 'l pensar! Chi se inamora
De un dolce che po in fondo xe velen,
Chi de un bel fiasco pien,
Altri, per so malora,
5Spasema per i bezzi;
Chi se farìa squartar in cento pezzi
Per arivar su qualche caregon,
Chi fa l'amor a un qualche medagion;
A chi ghe piaserave un abitin
10Curioso, galantin,
Ben fato, sveltolin,
Da goder el morbin;
Chi se dileta de un bel chitarin,
E chi de un cagnolin;
15E per vegnir al fin
In t'una Sechia un sior s'à inamorà,
E in so lode un bel libro el ga stampà.
Mo donca no bisogna
Che me vergogna
20A dir che mi me sento inamorà,
Brusà,
Invasà,
Copà,
Piuchè insatanassà
25Per la Zuca che indora le baise;
E che Vedel da Chioza ancuo se dise.
Za me lo vedo qualche bel umor
Che senz'alcun rossor
Me sbufona sul viso e che me fazza
30Co un muso da lirazza
Do, tresento sberlefi da smorfioso...
Via rognoso,
Via tegnoso,
Stomegoso,
35Schizzignoso,
Via de là de carognoso;
Via, fate in là, che se me salta un lampo
Co meza Zuca mi te cavo el stampo,
E po fazzo una Statua co un cartelo
40Aciò che tuti te cognossa a pelo,
E i sapia che ti xe colù che abomina
La Zuca che dà vita a tanto popolo.
Alora vardete,
Varda che i fulmina
45I sassi e i ravani,
E i pomi a fregole
Tra i fischi oribili
De un mar de popolo,
Che te considera
50Quel omo stupido
Che no ga
Nè palà,
Nè un fià
De onestà
55Per un pasto gentil da tuti amà:
Sì, la Zuca, la Zuca, la Zuca,
Sia santa o sia baruca,
O sia Zucoi col manego,
O Zuche anca salvadeghe,
60L'è un magnar da strupiai che fa bon pro
Fa tanto de panzon, purga i cocò,
Fa belo el viso, ve dà forza a i pì,
E consola el buelo per tre dì.
Oh! l'è un magnar da porchi in la mastela.
65Che stolida bardela!
Mo gran lengue! gran teste! gran scioconi!
Mo no vedè come con quei boconi
Giusto i porcei ve vien come tordeti,
Grassi, dolci, tondeti,
70De un gusto prelibato e soprafin,
Che ve consola proprio el coresin.
Del porcelo xe bon anca el zampin,
Xe un balsamo el coin,
Xe un botiro el sgrugneto;
75Un late xe el panzeto;
Del porco i fa luganega,
Del porco i fa le brombole,
Del porco i fa i boldoni:
Se magna el pel, le zate e i sporteloni.
80L'è bon rosto in speo,
L'è bon a scotadeo,
E grasso e insenetìo,
E bogiente e indurìo,
E dopo degerìo.
85E pur l'è tuto pur, e struca e struca
Tuto sugo de zuca
Quel che ga fato el chilo
Quel che ga fato el grasso;
Quel che l'à messo in filo,
90E ch'el fa deventar stupendonasso.
Mi che no diga ben? sì che ò da dir,
Che la Zuca xe quanto un elisir
Che dà la vita ai morti, e fa morir
Tuti i cancari,
95Tute le fistole,
Tute le racole
Dei mali che vien fuora
Dal vaso de Pandora.
Co me vedo in t'un campo semenà
100De Zuche ben zalone in quantità,
Za se me averze el cuor, perchè me par
Proprio de caminar
In Spizieria de ogni fedel Cristian
Dove chi xe malà se trova san.
105Trè zo quel servizial,
Che a chi ga le moroide el ghe fa mal,
Se ve volè purgar tolè sto toco
De Zuca rosta che anderè de oco,
Magari le buele,
110Che za salvè la pele.
Gaveu la rogna, le variole, el gosso?
Tuto calor che za ve buta in fosso.
Via no tolè potachi!
Cremor de tartaro,
115Mana potabile,
Mercurio fervido,
Negro rabarbaro,
Cassia che stomega,
China che tossega,
120Zuca tolè, che la indolcisse el sangue,
Tolè Zuca per pan, per companadego,
Zuca, Zuconi, e sarà tolto el radego;
Frita, lessa, arostìa, che proprio al fin
El sangue ve farè da colombin.
125Ve fa pecà i Spezieri
E ve impenì de scoazze
Per darghe le lirazze?
Oh mati vivi e veri!
Fidève pur dei Medeghi,
130Crèdeghe a le so massima,
Cerchè pur le so visite,
Struzève pur le vissere;
Ma fe pati col Nonzolo,
Che presto el Dotoron
135Ve buta a tombolon.
Mi certo no me tegno
Perchè go tanto inzegno
Da capir el gran ben che fa la Zuca:
Gnissun no me imbarluca,
140Ma salto co fa un mato,
Sbriso co fa un bisato,
Tiro fora la lengua, e cigo alturio
Finchè me bagno el beco co quel balsamo!
Coss'è, coss'è? sento cigar Tonina...
145Fermi là... zito... tasi, caro ti,
Lassa che senta... xela polentina?...
Oh co bona, oh co rara!... oh!... so qua mi
Mi no me tegno... Zuca schieta e neta
La Zuca benedeta...
150Largo, fe largo... fate in là furbazzo...
E ti budeladazzo
Vustu una slepa, o vustu una peada?...
Xe andà el Tabaro, resta la Velada...
Oe, da la Zuca, presto corè qua,
155Abiè carità,
No go altro fià,
Me son sfadigà,
Me son scalmanà,
Perchè no andè in là:
160Oimei, me consolo
Ghe so arivà a svolo;
So qua, me sbabazzo;
No co la man, voi meterghe el mustazzo.
Sì, coi deolini
165Se magna i confetini,
Col pironcin se slimega,
Col sculierin se becola,
Ma co piase no gh'è tanta pazienza
Da magnar a batua come un Celenza.
170Qua un trareto, do trari, una lirazza,
Tiolè i bezzi, la borsa e le scarsele;
Ma lassème slapar che me sbabazza,
Perchè se me consola le buele.
Qua una Zuca, do Zuche, tre Zuche
175De sante e de baruche,
Qua che beva sta broda,
Che sorba sta papa,
Che tuta la slapa,
Che tuto me goda.
180Via presto scàldeme,
Via presto sàzieme,
Via presto indòreme,
Via presto imbàlseme...
Oh che papa! che broda! che gusto!
185Bona per nu, che no portemo el busto...
Ma go sto comesseto
Che me strenze un pocheto...
Aqua, me ingosso,
Deboto me strangolo
190E pur no gh'è osso...
Me vien...
Me vien...
To dano: te l'ò dito che tel puso;
Va là porco, va là, làvate el muso.
195Ma intanto, e cussì
Gh'è Zuca per mi?
Oimei l'è finia
Gh'è apena la tola;
No gh'è scalcarìa,
200Chi mai me consola?
Oimei no go spirito,
I ochi me bagola,
Le gambe fa giacomo
El cuor se me sbrodega
205Perchè de sto oro
Me manca el restoro.
Se me volè vivo no me fè aspetar
Un burchio de zuche vegnime a portar.
Vegnì, vegnì presto,
210Tonina ve aspeto:
Ghen fazzo in brueto,
Ghen fazzo col pesto,
De frite co l'ogio,
De frite col struto,
215Ghe meto el cerfogio,
Ghel meto da puto
S'un toco de lessa:
Ghen brustolo in forno
Un quarto, ma in pressa,
220Po subito torno
A frizerla in techia
Intanto coro a casa che i parechia.
Olà, desmissiete,
Todero, averzeme;
225Fora le piadene,
Via presto fregheme
Caldiere, e lustreme
Fersore e techie,
E i piati indoreme
230Che à da vegnir la Zuca a far bancheto
E tuto ga da esser lustro e neto.
Fa presto, fa fogo,
Ghe vol quatro bronze;
Ti, gato, dà logo...
235Mi vogio ben conze
Le Zuche in desfrito
E ben brustolada
La rosta pulito;
Ga da esser panada
240La lessa, ti sa:
A le curte a pontin come che va.
Oh che godi! son proprio un paladin
Co me imbalsamo el cuor co sto broetin.
Che risi? che carname? che caponi?
245Tiolè risi; i me par quei pignoleti,
Che ve puza sti mestri manestroni:
Burlela, siora Dora? oh! i so manzeti
So che i ghe piaserave, e i so castrai,
Ma sieli pur frustai,
250Solamente i xe boni per i cossi;
Vòi dir per i Becheri; mezi bezzi
I xe butai in canal; che diavolezzi!
I ve dà meza polpa e mezi ossi,
E po che polpa? o la xe dura, un legno,
255O la xe papa a segno
Che la par degerìa,
O la xe insenetìa,
O la xe tuta grasso,
O sempia come un sasso,
260O la spuzza da lìspio; e po in tinelo
Ga d'aver anca el gato el so piatelo,
Perchè co sti bei lardi anca i ve zonta
Un toco de slambrichio sempre in zonta.
Via la responda, siora Dora amabile:
265Cossa serva i sberlefi? i me fa stomego.
La diga pur, se la ga fià, la squaquara...
Voriela dir: me piase i caponcini?
Cari quei bei bochini!
Tiolè un Capon, mezo ducato el val;
270Curèlo, governèlo, l'è un feral.
Ch'el sia anca bon: topa vel magna mezo
El gato, el can; cavèghe le buele,
Batè el corbame, curè ben la pele,
Oh se qua andemo pur de mal in pezo!
275Metè da banda i ossi: cossa resta?
Vu fe dezun, e 'l cagnolin fa festa.
Vardè che baronae!
Vardè che matitae!
Tanto darghe a le bestie quanto ai omeni!
280La Zuca no che no fa sti spropositi:
Spendo un traro, e sto traro è tuto mio;
Spendo un ducato, e 'l magno tuto mi;
So quel che compro, e co la xe cussì
Dopo che go comprà no pago el fio.
285La Zuca no ga ossi, e no ga spini,
No la xe dura, no la xe panada,
No la xe seca, nè destemperada,
No la spuzza da lispio; al fin dei fini
La ga el color de l'oro, e tanto basta.
290Mo che gran bona pasta!
Perchè no nassistu
Solo in America?
Che sior Vespucio
Su più de un Codice
295Te farìa celebre,
E vederessimo
Sora l'Oceano
Drio del to merito
Corer intrepide
300Nave e Trabacoli
Del Turco barbaro,
Del gentil Veneto,
De la gran Aquila,
E de ogni popolo;
305E sentiressimo
Venderte a fregole
A Dame e a Nobili,
E ai più gran Prencipi.
Alora ti saressi rarità,
310Ma per mi ti fa megio a nasser qua.
Che providenza!
Sta bona droga venze tuti i intopi,
La nasse in tuti i campi, e sta semenza
Se rampega su i muri e va su i copi,
315La regna in tei piteri, e squasi squasi
La ve nasse in pignata;
Qua la mia cara tata,
Vienme qua, che te daga cento basi.
Oe? cossa vedio, el burchio xe a la riva...
320Oh za me la sentiva,
Proprio el cuor lo diseva, e proprio el naso
Se me strupiava per l'odor soavissimo
Che quel fiascon de zuchero,
Che quel balon de netare,
325Che quel peaton de balsamo,
Manda per l'aria: oh! certo mi no taso...
Presto Tonin e Gasparo,
Piero, Martin e Prospero,
Polo, Chechin, Agapito
330Vegnì zo a tombolon;
Strupiève che n'importa,
Vegnì zo in prucission,
Trè zoso anca la porta,
Saltè zo del balcon,
335Rompè pur anca el muro,
Trè zoso anca la casa,
Ma se volè che tasa
Vegnì a tior sto tesoro,
Metemèlo al seguro,
340Ma presto presto presto,
Se no mi qua ve muoro.
Oh bravi! me consolo
A vederve qua tuti;
Bravo Tonin: co alesto!
345Oe varda ti, che ti ghe storzi el colo...
E ti? cossa ghe vol? tirela in tera...
Cossa fastu, baron? xela una piera,
Che ti ghe zapi su co quei stalfoni?...
Oh bravi, bravi puti
350So contenton: mo proprio se' omenoni.
El magazen
Xe tuto pien;
Adesso manca el megio, che xe ora
De impenir la pignata e la caldiera,
355La techia e la fersora,
La grela, l'antianelo e la tortiera;
Far che la Zuca bogia,
Far che la Zuca frisa,
Far che la zira in speo,
360Che la salta in pignata,
Che in techia la se cata,
E che la crostoliza,
E che se mostra a deo
Tuto sto liogo ben fodrà de Zuca.
365Via testa mamaluca
No te gratar la rogna,
Qua xe da bulegar, laorar bisogna.
Vogio dar una bona papolada,
E far de zuche sole una disnada.
370Tiòghene una, e fala in boconcini,
Che faremo manestra stupendona,
Un'altra a quarti fichela in caldiera;
Quela cussì zalona
Metila in forno tuta quanta intiera;
375E questa in fregolini
Metila in techia, che cussì pulito
Ghe xe manestra, lesso, rosto e frito.
Oh che consolazion!
No gh'è megio bocon.
380Che cuoghi a la Francese?
Che piati in desossè?
Fe tute ste gran spese,
E tossego comprè.
I polastrei ve fa vegnir la gota;
385Spendè bezzi in carname,
E po ve vien mal putrido;
I brui ve lassa fame;
La roba dolce in bota
Ve fa nasser i vermi; un altro piato
390Ve fa vegnir el flato;
Vardei sti crapuloni,
Gnanca de star in piè no i xe più boni,
I è Lazareti, vardèli pur vardèli,
El so tropo magnar li magna eli.
395La Zuca no che no la fa malani;
No la fa gota, no la fa sunanza,
La imbalsama la panza,
La fa far bela copa,
La fa papote grasse,
400La ve prolonga i ani,
E al più zoso a le basse
La cava qualche stopa
Produsendove un po' de zanzarela
Che al fin dei fini purga la buela.
405Oh benedeta! la manestra è cota,
Xe a l'ordine la lessa, e anca la rosta;
Ga tuta la so crosta
Quela che i à messo in techia a volta rota
Donca corèmo,
410Magnèmo,
Sguazzèmo,
Slapèmo,
Crepèmo.
Mi la magno co i ochi e co la boca,
415In panza la me sfioca,
E proprio se me indora le buele.
Co' cara! co' bona!
Co dolce, delicata e stupendona!
Me luse infin la pele,
420Me bulega de drento el coresin,
Quante cose in to lode vorìa dir!
Ma no posso tocarlo sto cantin,
Perchè dal gran sorbir
Sta bona papa, el corpo s'à sgionfà,
425E me sento un tamburo, e no go fià.