Le Quatro Stagion/L'Inverno
|
Edission original: |
Collezione delle migliori opere scritte in dialetto veneziano, Volume primo: Poesie di Anton Maria Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 1.djvu |
| ← III. L'Autuno | Edission e fonte ▼ |
Gera d'Inverno, e gera in compagnia,
E xe sta messo in campo la question,
Se de l'Istà l'Inverno megio sia,
Lassando fora l'altre do Stagion;
Che la gran moda adesso xe i estremi,
6E drio la moda se propone i temi.
E voltandose a mi: — Vu che avè fato
Più volte le Stagion, me dise un tal,
Cossa ve par? l'Inverno ad ogni pato
Xe megio de l'Istà, l'è natural,
Ma no me fe parlar la fantasia,
12Trovè fora rason e no poesia. —
— Mile grazïe, ò risposto, ma no posso,
Che mi co la rason no me ne intrigo,
L'è tropo disgraziada, e ò visto in fosso
Per causa soa ai mii dì più d'un amigo,
E se la vol che diga, la permeta
18Che diga el mio pensier, ma da poeta —
— Sì, sì, dise una dona, el ga del sesto,
E lasselo dir su quelo ch'el crede. —
— o mi, signora, me destrigo presto,
Ma no pretendo che i me daga fede,
E dirò, che l'Inverno è tal e qual
24Come una certa vechia da Noal.
Longa, sutila e senza carne a torno,
Con cento peli in testa tuti bianchi,
Co una bochèa che la ve par un forno,
E una brava sciatica in tei fianchi,
Coi ochi del color che xe el persuto,
30E la tosse obligada in fefauto:
Se l'andava in carozza, la diseva:
— Tornèmo in drio, ma par de sentir vento. —
Se qual cossa per casa la faceva:
— Sarè quela finestra e vignì drento. —
Co gera suto mai no la dormiva,
36E col siroco no la digeriva.
Tuto quel che fa bela la Natura
E dà un'idea de vita e de creazion,
Gera per ela inutile fatura,
La stava quasi sempre in t'un canton;
Quatordes'ore la passava in leto,
42E l'altre a tola, o al zogo de picheto.
Pur la diseva: — Co una ragazzota
Sta mia tranquilità mi no barato;
I me dirà, che son una marmota
Perchè no ziro atorno come un mato;
Perchè passo i mii dì fra quatro muri,
48E crio se no i me sera ben i scuri.
Ma quel leto, quel sono e quel magnar,
Quel bon goto de vin, quela partia,
I è gusti che de più no se pol dar,
E tuto quanto el resto xe pazzia,
E ordinarave mi, se comandasse,
54Che chi no fa sta vita i li impicasse —
Chi xe che de sta vechia no ridesse,
E che no schiamazzasse a piena boca?
E pur se un poco se ghe rifletesse
L'Inverno a far sta vita za ne toca,
E squasi tuti i gusti, a dirla schieta,
60Fenisse in pachio, leto, e camereta.
Gh'è qualche Inverno che se va stampando
Per chi xe de l'Inverno protetori;
Ma no l'è Inverno, e po' sto contrabando
Ghe costa a la Natura dei suori;
E come fa le done del bon ton,
66La vol refarse in st'altra tre Stagion.
Se xe un zorno seren, gh'è el giazzo in tera,
E le gambe e la testa è a mal partio;
A le vechie el borin ghe fa la guera,
E ben che abiè el tabaro se' servio,
Per tuti i busi el barbaro se fica,
72Ve brusa i ochi e 'l naso xe lambica.
Se xe siroco sguatarè de gusto,
E quel'umidità ve ariva a l'osso.
Nevega? Oh! alora sì, boca che vustu!
Perchè o s'ingiazzi o l'umido sia mosso
Ve godè a spotachiar per el paese
78E gavè un stilicidio per un mese.
Senza fogo xe fredo, e 'l fogo impizza
E imiserisse, e val tre soldi un fasso;
La stua ve inzuca, el caminar ve istizza,
Co l'aria dei Cafè deventè un tasso;
Se un teatro xe pien, l'aria xe un bagno,
84Se nol ga zente, ve impetrì sul scagno.
Dei reumi, de le ponte e de la tosse
E de cento altri mali sfondradoni
Mi no ve parlarò, che le xe cosse
Che sta Stagion regala per bomboni.
Curte, l'Inverno è morte, e stago saldo,
90Che no se trova un morto che sia caldo.