Le Quatro Stagion Campestri e Citadine/La Primavera Citadina

EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.

[p. 329 modifica]


LA PRIMAVERA CITADINA.


1L'aria xe tepida,
     Vien primavera,
     Fiorisce i bocoli,
     Ride la tera,
     E torna i zefiri
     A svolazzar,
2I coli floridi,
     I verdi prai,
     De viole e anemoli
     Tuti smaltai,
     Invida i omeni
     A vilegiar.
3«Son persuasissima,
     Cari poeti,

     Andè, godevela,
     Fè dei soneti,
     Che contentissima
     Stago in cità»
4Cussì, giustandose
     Co del rosseto,
     La bela Filide
     Trà via el libreto,
     Che ste sempiagini
     Ga registrà:
5«Fra mezzo ai albori,
     Mi sepelirme?
     Povari pampani,
     Voi divertirme,
     Nei megio circoli
     Vogio sociar.
6Come che un stolido
     De un oseleto,
     De l'erba, un alboro,
     Qualche fioreto,
     Podesse un'anima
     Felicitar!
7Se dei volatili
     Desiderasse,
     De quei più piasevoli
     Che me cantasse,
     Subito, subito,
     Li posso aver.
8E se 'l capricio
     Go de infiorarme,
     A mazzi i bocoli
     Posso comprarme
     Con un daquindese
     Dal mio fiorer.
9Ma cafè, circoli,
     Partie brilanti,
     Cenete, musica,
     Schiapi de amanti,
     La solitudine
     No me darà»
10Brava, ghe replica
     La camariera,
     Co quele grazie,
     Co quela ciera,
     L'andar a sconderse
     Saria pecà!
11— Son una femena,
     Cussì i m'à fato;

[p. 330 modifica]

     Ma se so un zovene
     Devento mato
     Solo a vardarmelo
     Sto figurin:
12— Co ste to frotole
     Devento rossa:
     No so sta Venere,
     Ma go qualcossa,
     So sana e zovene,
     Go del morbin...
13— E po co i omeni
     Ve core drio;
     Co 'l più teribile
     Lo fè un conio,
     Una marantega
     Per dio, no sè.»
14Ma ne la camara
     Entra fumanti
     Tre o quatro zoveni,
     Za tuti amanti,
     Felicitandola
     Del so levè.
15Chi porta un bocolo,
     Chi un regaleto,
     Chi à l'ochio torbido,
     Chi 'l soriseto,
     E a tuti, Filide:
     «Cari, bondì:
16Stago malissimo,
     Me dol la testa,
     Ma pur voi moverme;
     Sì, si: a la presta
     Quel nelson, Momola:
     Vegniu co mi?»
17El no deciderse
     Su sta domanda
     Saria gravissima
     Colpa nefanda;
     Un vegno unissono:
     La bela va.
18Chi ghe sta a latere,
     Chi sta da drio:
     La bela trotola
     Col più gran brio,
     E ochiae la sfiamega
     De qua e de là.
19Come xe el solito
     Se ariva in piazza:

     Più d'una Venere
     De umana razza
     Su e zo la pertega
     Col so perchè.
20La nostra Filide
     Le fissa tute;
     Le ochiae teribili,
     Le ingiurie mute,
     Za xe reciproche,
     Come savè;
21Ma po la semena
     Più fortunae
     Sora dei omeni
     Le dolci ochiae,
     Spesso zontandoghe
     Qualche sestin;
22E no la termina
     La spassizzada,
     Che diese o dodese
     L'à circondada;
     E a tuti Filide
     Ghe fa el bochin,
23Co la ga un numero,
     Che sia bastante
     Per poder crederse
     Dona trionfante,
     La va altri pelaghi
     A scorsizzar:
24«Che miserabile
     Passegio è questo?
     No ghe xe un'anima
     Che gabia sesto;
     Chi vol me seguiti,
     Vogio cambiar.»
25Cussì disendoghe;
     Verso la riva
     Va via sfilandose
     La comitiva,
     E ride el popolo
     Da stolidon.
26Xe in campo el spirito,
     E in t'un mumento
     Spiritosissimo
     Xe l'argomento,
     Che a tuti Filide
     Ghe impresta el ton.
27Se fa tripudio
     D'equivocheti,

[p. 331 modifica]

     Bomò finissimi,
     Pronti scherzeti,
     Tuto se dopara,
     E tuto va.
28Sempre istancabili
     No xe le bele;
     Se assae le trotola,
     Le cede anch'ele,
     Benchè recalcitri
     La volontà:
29Vorave Filide
     Andar più avanti,
     Ma 'l fianco gravita,
     Xe i pie pesanti:
     Dov'è, la mormora,
     Dov'è el cafè?
30Cigando, i replica:
     «Semo a castelo,
     Marina veneta,
     Quelo è 'l cartelo.
     — Lo vedo stolidi,
     No me cighè.
31In fati quindese,
     Che ciga tuti
     Co disarmonici
     Tonazzi acuti,
     Pol una Venere
     Convulsionar.
32Novo spetacolo
     Se ve fa avanti.
     De ninfe adriache,
     E de galanti,
     Vedè la camara
     Formigolar.
33Ma col so esercito
     Filide avanza;
     Tuto riceverlo
     No pol la stanza,
     E 'l più gran numero
     Xe a ciel seren.
34Un sito comodo
     Trova la bela;
     Tuto è silenzio,
     La tase anch'ela,
     Però giustandose
     La testa e 'l sen.
35Le ninfe adriache
     Come le bisse

     Sora de Filide,
     Se incanta fisse,
     E le la esamina
     Da capo a pie.
36Sta calma estatica
     Vien interota;
     De qua se mormora,
     Là se barbota,
     Chi cria rosolio,
     Chi chiama té.
37Se forma circoli,
     Cresce el sussuro,
     Se sente un strepito
     Più del tamburo,
     E se fa massima
     La confusion;
38Nasce dei scandoli,
     E fra le prede,
     Che à fato Filide,
     Qualcun se vede
     A far el perfido
     Sora el porton.
39Poveri diavoli!
     I se conforta:
     Star come i totani
     Sempre a la porta
     Xe tropo barbaro
     Tropo crudel!
40Li scovre Filide,
     E in t'un ochiada
     Vedè l'anatema
     Za fulminada:
     Destin teribile,
     Per chi è infedel!
41«Se co una scufia
     Metè una gata,
     Per dio quei stolidi
     Va là e la grata:
     I me fa stomego;
     No i so sofrir;»
42Cussì disendoghe
     Ai più costanti,
     La nostra Filide
     Se mete i guanti,
     Segno certissimo
     Del so partir.
43Lo vede i perfidi
     Quel fiero segno,

[p. 332 modifica]

     I lassa l'idolo,
     L'idolo indegno,
     Ma è tuto inutile
     Nè gh'è pietà.
44Dei novi subito
     Ghe vien arente,
     Co quei la chiacola,
     Co st'altri gnente,
     E la scomunica
     Ga za operà;
45Che no gh'è un'anima
     Fra quei disdoto,
     Che a sti sismatici
     Ghe fazza un moto,
     E i se determina
     Lassarla star.
46«Andè col diavolo,
     La bela dise,
     Co mi barzigole
     No fa raise;
     Ma dovaressimo,
     Sau dov'andar?
47A l'oratorio
     Dei mendicanti.
     Ghe xe la musica,
     Xe zorni santi;
     Andemo subito,
     Femo del ben.
48Za co tre trotoli
     Se ga i coreti,
     Che no me sofego
     Coi zendaleti;
     E là, stufandose,
     Se va e se vien.
49Ma sento el stomego
     Che vol ristoro:
     Corio al salvadego,1
     O vadio al coro?
     Rispondè, pampani,
     Dove? e cussì?
50Tuti xe pensili,
     Nissun risponde;
     Più che la strepita
     Più i se confonde:
     Stupidi, stolidi,
     E i vien co mi?
51La va a la musica,
     La xe in coreto;

     In bota el nonzolo
     Ghe dà el libreto:
     Sampson... «Che titolo!
     Disè, disè?...
52Sanson; quel diavolo,
     Quel che filava?
     No, quelo è l'Ercole.
     Quel che i tosava?...
     Latin... petevelo,
     Tolè, tolè.
53Tasè, petegoli,
     Tasè, che i canta...
     Chi xe sto cancaro?
     Vergine santa
     Che scagno incomodo!...
     Deme quel là;
54Questo me bagola:
     Cossa... el dueto...?
     Delai2 co l'oboe?
     Oh benedeto!
     Mi za lo strucolo;
     Che 'l vegna qua.
55Fè che 'l lo replica:
     Vogio Delai...
     Zente senz'anima,
     Ste là impalai?
     Che bela musica!...,
     Caro colù!»
56Una dolc'estasi
     La porta via,
     Tuti xe atoniti;
     La bela cria:
     Presto al salvadego,
     No posso più...,
57Ecola in tavola:
     Quanti scherzeti!
     Che ochiae che bisega!
     Che prindeseti!
     E su le fritole
     Quanto scherzar!
58El pranzo termina
     A cinque in ponto;
     Tuti beatissimi
     Paga el so conto,
     E se va Filide
     A ritirar.
59Mi no la seguito
     In quei mumenti:

[p. 333 modifica]

     Chi vol parlarghene
     No xe prudenti,
     E se gh'è fufigne
     Mi no le so.
60Tornarè a vederla,
     Sarò presente
     A l'ora solita,
     Co vien la zente,
     E a l'academia
     La trovarò.
61Là al lume candido
     De le candele,
     Fra cento cocoli,
     Fra cento bele,
     Tinte più armoniche
     La gavarà.
62E sin che i musici,
     E i sonadori
     Farà del strepito,
     Su tuti i cuori
     La bela Filide
     Trionfarà.
63Tornarò a vederla,
     Brilante in piazza.
     Rider, spartindoghe
     Una fugazza
     A diese zoveni
     Brasai d'amor;
64Criando estatica:
     Che bela sera
     Oh che delizia!
     Gran primavera!
     Che stagion cocola!
     Me cresce el cuor,
65Tornarè a vederla
     Per sti casini
     O a magnar brocoli,
     O sui matini
     Dal famosissimo
     Sior Valentin:3
66Ma sul mar tremolo
     Sponta l'aurora,
     Se svegia zefiro,
     I osei vien fora,
     E va indorandose
     Qualche camin.
67In cielo sfiamega
     La luse d'oro,

     La zente misera
     Torna al laoro,
     E salpa l'ancora
     El mariner.
68Pase o mia Filide,
     E in vu destili
     Sono benefico.
     Sogni tranquili,
     Fioli de Venere
     E del piacer.



Note da l'edizion del 1845
  1. Antichissima osteria vicina alla piazza di San Marco.
  2. Delai fu celebre suonatore di oboe.
  3. Era notissimo caffettiere in piazza di san Marco.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Le_Quatro_Stagion_Campestri_e_Citadine/La_Primavera_Citadina&oldid=44423"