Mariegola de la Scuola Grande de san Giovanni evangelista
|
Edission original: |
Archivio di Stato di Venezia, Scuola grande di S.Giovanni Evangelista, reg.8., c. 1-5 |
|
Fonte: |
http://www.sgiovanniev.it/istituzionale/pagine/mariegola.htm |
| Edission e fonte ▼ |
In nomine Patris et Filii et Spiritus Sancti, amen.
- [ Capitolo] I
Al nome de Dio eterno, amen. In lo anno del nostro Signor Ihesu Christo mille duxento sexanta uno, indicion quarta del mexe de março, a l’onor del nostro Signor Ihesu Christo e de la gloriosissima Vergene e mare Madona senta Maria e del beatissimo e preciosissimo apostolo et evangelista misier sen Çane, chavo e confalonier de questa benedeta Scuola, fo començada questa regola e fraternitade de disciplina a la glesia de misier sento Aponal. Et in mille trexento e VII, indicion quartadecima del mese d’avril, fo translatada la dicta Scuola al dito luogo de misier sen Çane evangelista, in lo qual nui semo asembladi, a l’honor del qual çaschadun de nui in çenogioni a soa laude e reverencia diga una fiada lo Pater nostro con l’ave Maria.
- Capitolo II
Quanto la prexente vita sia flevele e caduca, in stessa la humana fragilitade apertamentre ne amaistra e demostra ch’el misero homo continuamentre sì ponto da solicitudine e sì alligado de ligami de subiection diabolica, e sempre sì involto in li peccadi. Onde como dixe la senta scriptura «lo fantolin de un dì no è sença peccado». E lo biado misier sen Çane evangelista dixe «se nui dixemo che nui no abiemo peccado, nui medieximi se inganemo». Perché «çaschun mortal fin a tanto ch’el vive» como dixe lo biado Agustin «quando uxa in la temporal vita, vive in patria strania». E perçò se die sempre aver avanti li ogli lo fin del tempo de questa transitoria vita, e pensar ch’el die recever premio del ben e pena e del mal perché lo nostro Signor Redemptor nui amaistra per lo so sento evangelio, digando «veglè et orè perché vui no savè n’el dì né l’ora». Onde, inspiradi nui de la divina gra[tia] pensassemo e tractassemo como per dilection de fraternitade e adiutorio de oration la salude de le nostre aneme possamo acquistar, recordandose quel dito del biado sen Iacomo apostolo, lo qual dixe «orè l’un per l’oltro açò che vui sie salvi, perché molto val la continua pregiera del çusto». [...]