Sta pagina la xe stà trascrita, ma la gà ancora da vegner rileta.
METAMORFOSI DEL COR!
Gh’è de le volte che me sento ’l cor
Cossì pien de bontà e de contentessa,
Che no’ me cambiarea con qualche sior
Gnanca se ’l fusse sior de più del Tressa!1
E invesse qualche volta gh'è ’l dolor,
Che ’l stà de casa in te’ la casa stessa
Cove ghe stà Baldoria e Bonumor,
Che ’l me dà ’na tirada de cavessa!
’Na tirada che in tochi la me buta,
Che la me porta via de colpo tuta
La contentessa e tuta la bontà...
Alora mi, forsi i lo crede in pochi,
Parchè ’l dolor el se tirasse in là,
Me farèa 'l più pitoco dei pitochi!
- ↑ Tressa - cognome di una ricchissima famiglia veronese.