Sta pagina la xe stà trascrita e rileta.
II.
Marcheto Guercio, in meso a tanta gente,
bufon de corte e sbafador de valia,
sempre a drio a pensar mal, sempre in batalia
de andar a feste sensa spendar gnente,
Marcheto Guercio, el s’era messo arente
a Madona Giulieta e a la so balia
e de scherseti el ghe fasea regalia
e de ociadine el ghe fasea presente.
Solo el g’avea un ridicolo difeto:
che le so mane, nel tocarle a pena,
l’è pareva ingiassè come el sorbeto,
sia che el fusse de inverno o pur de istà,
a pansa uda o co la pansa piena,
a casa, a spasso, in ciesa o in società!