Pagina:Berto Barbarani, Giulieta e Romeo, 1905.pdf/84

Sta pagina la xe stà trascrita e rileta.


co la so facia tirada a fil,
col so vestito taiado a fete,
a seconda che l’ombra ghe permete,
del campanil.

O colonete, sutile, sutile
come un brasso de dona ben tornio,
fiole de un arte nata sensa bile,
che parì ferme e pur ve corì a drio;

che sì tute così, come una festa
de moneghine, che no pensa a gnente,
col vostro mato capitel in testa,
sempre compagno e sempre difarente...

No savìo dirme no, bele signore,
come Giulieta l’à passà ste ore?

Le colonine me risponde alora:
Fè a pian, fè a pian, parchè la dorme ancora!

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Berto_Barbarani,_Giulieta_e_Romeo,_1905.pdf/84&oldid=72660"