Pagina:Berto Barbarani, I due canzonieri, 1917.pdf/14

LE RABIÈTE.

     Quando sul to facin da birba bela,
par farghe a i oci un tochetin de ombria,
te casca zo i risseti a bogonela,
te me pari un bombon da mètar via...

     E su, in granar, tra un çésto e tra un'arela¹
da cavaleri, scòndarte voria,
e drio del legno de la rebaltèla,²
par qualche sbacio³ te faria la spia.

     Ma quando te te inrabî, alora i rissi
i diventa do coe da meneghin,
do brute coe de sgrèndeni postissi,

     e no, in granar (che su gh'è i peri fati)
par guernarte la testa dal morbin,
voria portarte in càneva,⁴ co i rati!

1. arèla: tavola di canna per i bachi o per l'uva
2. rebaltèla: piccola finestra praticata nella porta per spiare
3. sbacio: fessura
4. caneva: cantina.