II.
La me morosa l'è 'na moretina
piena de grassia e furba de talento,
la g'à i cavei de seda molesina,1
tegnudi su da un pètene d'argento...
Neri anca2 i oci dove se infrusina3
diverse qualità de sentimento,
labri de fogo vivo de cusina,
col nasin che ghe fa da paravento...
La me morosa la g'à nome Nina...
Quando la pianse la trà fora i oci
e se ghe inrabia tuta la facina;
trema i mobili e i seci, i piati i s-cioca,
piove lagrime in perla sui zenoci,
e mi pronto a ciaparle co la boca! –
