Pagina:Berto Barbarani, I due canzonieri, 1917.pdf/200

V.

Semo in Corte d'Assise – Presidente:
     – Margarita, vien quà, cònteme adesso
     parchè in strada da ti, dise la gente
     che t'è successo... quel che t'è successo?

C'elo stado sto sior che t'ha impromesso
     e mari e monti par vegnerte arente?¹
     – El nome no lo so, sior presidente...
     – Mi ghe voleva tanto ben l'istesso...!

Testimoni (Vien drento la parona)
     – Giusto ela, com'ela sta fassenda?
     – Mi?... La putela la m'ha parso bona,

ma le serve, lu el sa, che dài e dài,
     par pulito, ma assè che se ghe tenda,
     le rompe tuto e no le parla mai!

1. arente: vicino, nell'intimità.