Pagina:Berto Barbarani, I due canzonieri, 1917.pdf/212

I.

«Bala che vegna!» — Minico Bardassa,
     rebate el colpo che vien zò dal çiel,
     e tuto quanto in giro par la piassa
     cioca e se spande el son del tamburel...

San Zen l'è chieto! — Una carossa ferma
     l'à pena infastidì coi forestieri;
     una tromba vissina de caserma
     mete un gusto de amaro a i so pensieri...

Eco un s-ciapo¹ de ròndene che passa
     dessemenando dei negreti² in çiel...!
     «Bala che vegna!» Minico Bardassa,
     sbalia batuda e tase el tamburel.

1. s-ciapo: stormo
2. negreti: punti neri.