Pagina:Berto Barbarani, I due canzonieri, 1917.pdf/233

I.

Dopo de aver lassado quel paese
     dove che dorme stofegado un sigo
     par 'na vecia rosaria¹ de pretese,
     che guai se le disesse – e no le digo,

parchè za me capisse quei che lese –
     mi e me fradel dotor, co 'n altro amigo,
     omo de testa e gran pitor de cese,
     èmo fato una tapa su Ossenigo.

E, molando 'na ocià par la valada
     dove l’Adese va lustrando via
     le scarpe a i monti che ghe dà la strada,

dopo gnanca l'afar de un quarto d'ora,
     êmo visto scapar la ferovia,
     co le tedesche che guardava fora...

1. rosaria: storia, vicenda.