VI.
Se mi g'avesse du cavai che trota,
che sgolasse par aria al me comando,
come se sente sul camin che scota,
ne le rosarie, che i ne va contando;
de sentiero in sentier, de grota in grota,
de sengia in sengia sempre galopando,
par strada giusta o su la strada rota,
a seconda el çervel se va pensando,
ora in çima a un gran monte, ora zò in fondo
de un precipissio dove l'aqua rusa,
e in nome de la vecia poesia,
su tute le montagne de sto mondo
vorìa piantarghe una canson che slusa
e una bandiera che la fusse mia!
