Pagina:Berto Barbarani, I due canzonieri, 1917.pdf/242

X.

Eco el forte de Rivoli, che leva
     alta la testa, e quei de Monte, e a sanca¹
     quelo de Cerain che quasi gnanca,
     tanto l'è basso, no se lo vedeva.

Eco Gaion da la bareta bianca,
     col so camposantin che el par che el beva
     l'aqua fresca de l'Adese, e el riceva
     tuto quel sol che da la Ciusa manca.

Quel l'è Volargne e quel l'è Domeliare,
     e Sant'Ambrogio de Valpolesela
     co i marmi rossi de le so preare.

Dopo, l'Adese el va par loghi sconti
     traverso ai campi de Verona bela,
     magnando rive e saludando ponti...

1. a sanca: a mancina.