Pagina:Berto Barbarani, I due canzonieri, 1917.pdf/47

Sta pagina la xe stà trascrita, ma la gà ancora da vegner rileta.


     Ma c'elo dunque che g'à el cor che tasa,
da distante, distante a lavorar,
e scoltando l'udòr de la so casa,
               che lo ciama a disnar,
no ghe se mola dal so posto el cor,
come i Re Magi, a tegner drio a l'udor?

     E co i scartossi1 de la roba bona,
no 'l cora in çerca del bambin Gesù...
che l'è la mama sentà zo in poltrona,
               che no lavora più,
o la sposeta fresca e mesa mata,
che ghe va incontro col putin che lata?

     È tornado i studenti da le scole,
è tornado i remenghi al so granar...
Quante storie stasera, quante fole
               davanti al fogolar!
Fuma el vecio Nadal tra tanti onori,
fuma tuti i camini e fuma i cori!

  1. scartossi: cartocci.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Berto_Barbarani,_I_due_canzonieri,_1917.pdf/47&oldid=70500"