Pagina:Berto Barbarani, I due canzonieri, 1917.pdf/58

III.

     Po', un bel giorno, la févara¹ te ciapa,
te scota i polsi e àida² a l'ospedal...
Oh, da quel sito, quando se sta mal,
da quel sito che là, no se ghe scapa!

     I te dise che là se sta da papa,
medissine, dotori, un carneval,
ma lì a rente l'udor del funaral,
ma la morte che ride co la crapa!³

     E a la festa, nissun se ferma mai
par dirte «ciao», ma tuti i tira avanti
a portar su altri leti i so regai...

     Ma ti, alora, col fià da moribondo,
maledisseli pura quei birbanti,
che i t'à lassado dopo messo al mondo!

1. févara: febbre
2. àida: espressione veronese di comando imperioso, che equivale al marche militare
3. crapa: teschio.