III.
Da quela volta no l'è sta più ela,
ma gh'è vegnudo tanto mal al cor,
che l'à ridota come una candela,
come una rama che l'à perso el fior...
Gh'è restado i cavei de carbonela,
ma drento i oci s'à smorsà el slusor....
– Ehi, Carboneta, dunque come éla?
– Ah, la risponde, se el savesse, sior!
. . . . . . . . . . . . . . .
Se sente un sigo! – Oh quanto, quanto mal!
Co un brasso in tochi e col facin stravolto
i à portà Carboneta a l'ospedal....
Maledeta filanda! A passo a passo,
quel'ingranaio che l'onor g'à tolto,
quel'ingranaio el g'à robado un brasso!
