Pagina:Berto Barbarani, I due canzonieri, 1917.pdf/75

Sta pagina la xe stà trascrita, ma la gà ancora da vegner rileta.
SAN MARTIN.


I.


     ― Dunque?
          – No 'l vol saverghene. – L'à dito:
l'è du mesi che tribulo e che speto...
Via da mi, via da mi; ve lasso el leto,
ma el resto me lo tegno par l'afito.

     G'ò un fiol a i studî che no 'l fa pulito,
g'ò el predial da pagar, che son poareto...
Se me portè fin l'ultimo scheeto,1
forsi... cissà... che no tiremo drito!

     – Mi g'ò risposto che te sì malada,
che te sì anca in stato interessante!
L'à sigado «doman ve buto in strada».

     – G'ò zontà2 che a andar via ti te me mori...
Sêto cosa el m'à dito, quel birbante?
«Che i fioi ghe li lassemo far a i siori!»

  1. scheeto: centesimino
  2. g'ò zontà: gli ho aggiunto.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Berto_Barbarani,_I_due_canzonieri,_1917.pdf/75&oldid=70553"