Pagina:Berto Barbarani, I due canzonieri, 1917.pdf/83

IV.

     Come che le ne piove da montagna,
col fasso a spale e la pesseta¹ in testa,
cantando le vilote² de la festa
e el masseto infilà ne la pistagna,³

     zo par le sengie, Dio che le compagna,
no gh'è sassi nè bissi che le aresta,
fassa bel tempo o fassa la tempesta,
col sol che s-cioca o l'acqua che le bagna,

     co i seni sgonfi e streti in penitensa
soto le corde, e el Montebaldo griso
dove che sbocia el fior de sta semensa,

     col vento in recia pien de paroline,
col lago in fronte che ghe specia el viso...
Eco che passa, le Montebaldine!⁴

1. pesseta: fazzoletto
2. vilote: stornelli delle valli veronesi
3. pistagna: risvolto del giubbetto
4. Montebaldine: contadine del Montebaldo. Tanto queste quanto le altre montanine, specie nelle montagne del Trentino, della Vicentina e del Bellunese, usano scendere in città sul finir dell'autunno per cercar di che guadagnarsi da vivere.