II.
La fia del barcarol val megio assae
De çerte zentildone del bon ton,
Che porta tuto el zorno in proçession
Le so belezze dal barbier comprae.
Che le se vesta pur d'oro e d'arzento,
La fia del barcarol ghe ne val çento.
Che le se sesta come che le vol,
Val megio assae la fia del barcarol.
III.
Vegnì, vegnì, putele, a la marina,
Dove co' l'onde zoga l'amor mio.
A contemplar vegnì la mia Betina,
La mia Betina bela come un dio.
A contemplar la carne bianca e rosa
E i cavei biondi dela mia morosa.
I cavei biondi e l'ocio e la manina,
Vegnì, vegnì, putele, a la marina.
