Pagina:Le Rime Veneziane e Il Minuetto.djvu/30

Sta pagina la xe stà trascrita, ma la gà ancora da vegner rileta.
IV.

La mia morosa l'è 'na maravegia,
Nata a Castelo disdot'ani fa.
Più de un palazzo val più de una regia
El so vecio tugurio screpolà.

La ga la drezza bionda e l'ocio nero,
E la va via co' portamento fiero.

Se la vedè, fioi mii, voltè la testa,
Perchè a fissar el sol orbi se resta.


V.

Stanote m'ò insognà, tesoro mio,
Un sogno orendo, un sogno da morir.
Quatro bechini cole torse a drio,
Che te portava, Nina, a sepelir.

Supiava el vento forte e scravazzava...1
Mi, come un mato, pianzeva e zigava.

Zigava... e m'ò svegià. T'ò visto ti...
Nina, per quelo t'ò strucà cussì.

  1. Pioveva a dirotto.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Le_Rime_Veneziane_e_Il_Minuetto.djvu/30&oldid=63226"