Pagina:Le Rime Veneziane e Il Minuetto.djvu/93

Sta pagina la xe stà trascrita, ma la gà ancora da vegner rileta.

Le mascare de l'arte, ridote senza pan,
Xe andae via maledindo el nostro Venezian,
Tornando povarete tute ale so çità;
Fora de quela macia de Arlechin, che s'à dà
75A far l'omo politico, cambiando co fortuna
Le teorie de Stato, ogni cambiar de luna.
Mi, assae più furbo, omo de mondo e navegà,
A brasso de Goldoni, l'Italia go viazà,
E tuti al bon mercante ga fato de capelo,
80Tuti, senza la mascara, lo ga trovà più belo.
Grama comedia quela dei comiçi a sogeto,
Ziogo da tosi, senza vita, color, efeto.
Scoltè. Pena che i fioi vol far le prime prove,
De un teatrin de carta le marionete i move,
85E i ghe fa dir a tute spropositi e sempiae,
Intanto che la spatola de Arlechin dà legnae.
Ma co i deventa grandi, co i leze e scrive tanto
Che basta per capirli, alora, alora, quanto
Odio per el teatro de carte! i lo abandona
90Co le so marionete sora qualche poltrona,
E i reçita davanti a la mama e al papà,
Da lori la comedia ch'el mestro ga insegnà.
Ecove in miniatura, co un paragon preçiso
La comedia za scrita e quela a l'improviso.
95El genio de Goldoni ga dà figura e vita
A quei tochi de legno co la comedia scrita;
E portando in teatro l'arte e la verità,
Tuto un mondo de stupide fiabe l'à rebaltà.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Le_Rime_Veneziane_e_Il_Minuetto.djvu/93&oldid=63267"