Pagina:Poeti antichi del dialetto veneziano 1.djvu/37

Sta pagina la xe stà trascrita e rileta.


54Murga responde: Mi no te cognosso,
     Ti no se' da mio par giurde chiopec!
     Se no ti vol che te rompa pì d'un osso,
     E sul mustazzo aver Salamelec.
     El Nicoloto: Mi ò nome Zan Rosso,
     El dise, e no intendo sto bilic belec;
     E tut'a un tempo de falso roverso
     A Murga dete sul muso a traverso;

55Digando: Questa sarà el Turciman.
     Murga romase una statua de piera
     Quand'el sentì costù menar le man:
     Putana, el dise, da la dolce ciera!
     Mariol, traditor, gagiofo, can,
     Ti no te partirà da questa fiera
     Che te fracherò el naso, furfantazzo;
     E la so' grigna se revolze al brazzo.

56Zan Rosso gera in guarda de falcon,
     E col baston stava sul ziogolar.
     Costù de scrime xe più che gioton;
     Murga s'à fato avanti per menar
     A Rosso su la testa un stramazzon;
     Rosso da banda a vodo el lassa andar,
     E d'un mandreto ghe dè s'un garetolo
     Che de la calza el ghe cavète el gretolo.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poeti_antichi_del_dialetto_veneziano_1.djvu/37&oldid=72983"