Pagina:Poeti antichi del dialetto veneziano 1.djvu/46

Sta pagina la xe stà trascrita e rileta.


81— No ve partì, aspetè, criava tuti,
     Che gaverè scalete e de le nose.
     Intorno el Ponte gera mile puti
     Che a pì poder i alzava su la ose;
     Aspetè, amici, che senza laùti
     Vu balerè un baleto senza vuose,
     A son de gnacherar e triche trache
     Su i schinchi, su i mustazzi e su le lache.

82Masorana, Ganzara e sier Zonfeto,
     Tuti tre in ato de far dopio atorno,
     Se volta in drio, digando: Nu de leto
     Se levassèmo suso avanti zorno
     Per vegnir a magnar de sto confeto;
     Ma vegnì suso, che aspeteu? el corno?
     O el Bucentoro che vegna per vu?
     In questo tuti tre saltava su.

83Un indrio l'altro, e la vesta revolta
     Intorno al brazzo aveva tuti questi,
     E anca in cao la celada racolta
     A mezo el Ponte per dar i so' resti;
     E qua Zonfeto dise: Nico, ascolta,
     Perchè la vaga con tuti i so' sesti
     Mi farò qua con Bio, e ti, e Ganzara
     E sti altri do' se dara la so' tara.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poeti_antichi_del_dialetto_veneziano_1.djvu/46&oldid=72106"