IL SOGNO
Ò quel serpente de la zelosia
Che m'à butà in le vene el so' velen,
Che se vedo un osel sora 'l mio ben
Temo che infina lu mel porti via.
Amor, che vol mo darmela compìa,
Fa spesso che in insonio ela me vien,
E me par de vederla a un'altro in sen
Nemiga sì che la scortegarìa!
La me par impegnà per questo e quelo;
E chi po' xei? rivali e mii nemighi
Che gode del so' ben, del mio martelo.
No basta che vegiando ò tanti intrighi,
No basta che custìa no ga cervelo
Che ò, per zonta, al dormir de sti castighi.
