LE BELLEZZE DI MADONNA
Certi cavei rizzeti inanelai,
Negri com'un veluo negro de pelo,
Ornamento d'un viso cussì belo
Co' se possa a sto mondo veder mai;
Un per d'ochi assassini che fa assai
Chi scampa via senza lassarghe el pelo,
Denti po', lavri e boca, e tuto quelo
Che pol far desmissiar i indormenzai.
Ma quel che avanza el resto è certa gola,
Che, su la fede mia, da quel che son,
La val un pezzo d'oro quela sola.
E vita e drapi e disposizion
E grazia in ogni gesto e ogni parola
Che ve par d'ascoltare un Salomon.
No m'abiè per minchion,
Che vòi più presto un sguardo da custìa
Che 'l gran tesoro de la Signorìa.
