Che bisogno ghe xe de simular?
V'amo, Cate, nol nego. È forsi mal
Amar come che va? Se deve amar
4Con purità e con amor cordial.
Vardeve da un ingrato e disleal,
Da un che v'ama solo per burlar;
De un amor inocente e amor leal
8No se se deve gnente vergognar.
Se v'amo? no lo nego; e de dì in dì
El mio amor va crescendo sempre più;
11Ma fazza Dio quel che xe destinà.
Mi temo molto, o Cate, in verità,
Temo che vu, oh Dio! no fè per mi,
14O, per dir megio, mi no sia per vu.
Voleu saver perchè, Cate careta,
Tanto me dè in tel genio e me piasè?
Oh ve lo dirò mi, se nol savè;
4Sol perchè savè far la ritroseta.
Quel mostrarve modesta e sdegnoseta,
Quel sprezzar quel che forsi più bramè,
Quel saver dir: Sfazzà no me tochè,
8Cosse tute le xe che assae me aleta.
Se una puta vanzar vol qualche cosa
Sora un bon zovenoto inamorà;
11No ghe xe megio che far la ritrosa:
Ma quando po che a sguazzo la se trà,
Nè sa, nè la vol far la vergognosa,
14Zo dei calcagni al moroso la va.
Questa xe verità:
La vostra mercanzia no val un bezzo;
17Ma col negarla la fè star in prezzo.
Volubili, incostanti, menzognere,
Interessade, vane, sospetose,
Chiacarone, ustinae, lusinghiere,
4Impazienti, sprezzanti, maliziose,
Aroganti, implacabili, severe;
Inganevoli, astute, puntigliose,
Incorigibili, tenaci, fiere,
8Importune, superbe, dispetose;
Che no ga per nissun fede nè amor,
De cervelo lisier come xe un'oca,
11E d'ogni nostro mal vera cagion.
Cussì contra le done un gran dotor
Esclamando l'andava a piena boca;
14E ghe respondea l'eco: Oh che c...!
El maridarse in una che sia bela,
A chi nol sa, la par consolazion,
Ma chi del mondo sa qualche novela
4I tien diferentissima opinion.
In fati a una muger come una stela
Da mile ghe vien fato osservazion;
E ancuo sofri sta cossa e diman quela,
8L'è po facile a dar qualche sbrisson;
Però vu, amigo mio caro, che sè
Per entrar presto drento de sta scuola.
11Vardè ben, caro vu, come che fe.
Bela, sior no, ma una prudente fiola,
Onesta e savia vogio che trovè:
14Che questo è quelo che v'à da far gola.
La belezza la svola,
E chi cerca beltà senza virtù
17Cerca un lazzo che 'l pica e gnente più.
