Ariana, Ariana, co te vedo, oh dio!
Me crepa el cuor in sen,
Resto da compassion squasi sbasio!
Dove xe anda quel ben,
Che ti godevi un dì? povera grama!
Ridota s'una strada
Da tuti abandonada,
No gh'è più chi te varda, chi te brama;
Arlevada da dama,
Ti ghe supiavi soso ai pastizzeti,
E ancuo ti fa le bave sui zaleti.
Avezzada a dormir s'un canapè
Coverto de persiana,
Dove se podaria sentar un re,
Ancuo ti fa la nana
O su la pagia, o s'un bocon de stiora,
In scuderia, in rimessa;
O soto la barchessa,
E tante tante le gran note ancora
Te toca star defora
Sul nuo teren coverto de fredura,
Perchè no gh'è nisson che te rancura.
Ah! dove è mai quel bravo servitor,
Vicenzo dove xelo,
Che te tegniva bela quanto un fior?
Ti perdi tato el pelo,
Petene no gh'è più, no gh'è bruschin,
No gh'è più servitori,
Ti sa da mile odori,
T'incensi tuto el mondo da freschin....
Malegnaso el destin,
Che t'à ridoto d'una bela puta
In t'una carogneta che ributa!
Se ti geri un tantin de mal umor,
Se un'ongia te doleva,
Se impeniva el palazzo de rumor,
Subito se coreva
A cercar del to mal la medicina;
E ancuo, che no gh'è cani
Che gabia i to malani,
No gh'è più chi te daga un'ochiadina....
Povera bestiolina,
Te sarave passà mai per la testa
De perder tanto ben cussì a la presta?
Ti geri la delizia del paron,
La dama te adorava,
E guai a chi t'aveste dà un urton!
Tuti te carezzava,
Ti geri più stimada d'una zogia,
Tuti te gera drio
Come la mare al fio,
E ancuo no ghe xe un can che più te vogia,
Tuti te manda al bogia
In compagnia de tuta la to razza,
Nè gh'è chi no te oltragia e te strapazza.
Che colpa xe la toa? coss'astu fato,
Povera disgraziada?
Gnente, se dise, sior, ma gnente afato;
Vechia son deventada,
Piena de dogie e piena de schinele;
Questi xe i mii pecai
Co se xe vechie, guai!
Parlo co vu altre done fresche e bele;
Godeve pur sorele,
Tegnive in bon; ma vegnara quel dì
Che incontrarè la sorte che go mi.
Cara Nina, vien qua che te varda....
No t'ò visto mai più tanto bela,
Ti xe bianca, ti è grassa, ti è sguarda;
Ti xe in soma una rosa, una stela.
Mo che drezze più bionde de l'oro!
Mo che cegie, mo che archi d'amor!
Mo che ochieto, co vivo, co moro!
Che bei lavri che brusa ogni cuor!
Che dentini del late più bianchi!
Che brazzoti, che man, che penin!
Mo che colo, che peto, che fianchi!
Che grazieta, che brio, che sestin!
A le curte, el to esterno xe belo,
Ma el to cuor, cara Nina, xe un can;
Ti ga un cuor che ga tanto de pelo,
Ti ga un cuor indiscreto, inuman.
