Donca andè pur, ve benedissa el Cielo;
Ma prima che partì, ve voi contar
Una fiaba, che par fata a penelo
60Per chi sta ben, e no ghe vol mo star.
Me l'ha dita mio pare Stefanelo,
Che no gera un capon. Stela a ascoltar;
E se no avè per logica una piavola
Sgarugievene el senso. Eco la favola.»
65Una volta da le viscere
D'una florida colina
Xe sta visto, là a la China,
Do rusceli scaturir.
L'onda pura i sgorga unanimi
70Per un facile declivio,
Ma ghe mostra presto un bivio
Destin vario da seguir.
Prai, vignete, boschi ombriferi,
Un li chiama a fecondar;
75L'altro al ciel per tubi idraulici
Geme limpide a vibrar.
Un dei do rusceli in gringola
Sdegna in bota i fiori e l'erbe,
Vol portar l'acque superbe
80A la regia de Pechin.
L'altro invece, noto d'indole
Più modesta e più tranquila,
Score lento per la vila;
D'ogni campo fa un giardin.
85Qua 'l ristora verze e brocoli,
Là el va i bisi a rinfrescar,
Qua 'l conforta peri e perseghi,
Là fa i sparesi spontar.»
Va Lucieta sul so margine
90Fiori a scielgerse la festa,
La se i punta su la testa
Consultando quel crestal;
Ghe va adosso col so credito
Momoleto dal bel naso,
95La ghe paga el pro co un baso,
Lu ghe dona el capital.
Fa quel dopio verde pascolo
Manzi e piegore ingrassar,
De qua Biasio sona el pifaro,
100Sentì Pasqua là a cantar.
Su le rive amene e fertili
De quel placido ruscelo
Fa i vilani el garanghelo
Va le femene a filò
105Tosi e tose qua se biscola,
De là i zoga a maria-orba,
Quel se sconde in t'una corba;
St'altro trota; e tunfe, zo.
Per quel chiaro umor diafano
110Che fa i cogoli brilar,
Luzzi e trute sguinza e bagola,
Va le anguile a serpegiar.
Xe alfin tanti i benefici
Che fa ai campi quel bel rio,
115Che i vilani el crede un dio,
E i lo adora in zenochion.
Che se mai gh'è chi l'intorbia,
Chi stornar ghe vol el corso,
Gh'è chi 'l fa balar da orso
120Soto ai colpi d'un baston.
Cussì 'l resto d'acque limpide,
Che in tributo el porta al mar,
Dolci ancora come el zucaro
Va i sturioni a consolar.
125Ma tornemo a so fradelo,
A quel mato de ruscelo,
Che la boria
Crede gloria,
Che se imagina a Pekin
130De cambiarse l'acqua in vin.
No ga apena la colina,
Quel mozzina,
Abandonà;
L'è stà apena ne la vale,
135Che a le spale
Gh'è saltà
Ortolani, giardinieri,
Coghi, sguateri e stafieri,
Favoriti e parassiti,
140Tuto el treno numeroso
Del superbo, del fastoso
Mandarin Kekakalà,
La probosside, voi dir,
El visir
145De so maestà.
I ghe cambia leto e sponda,
I ghe incalza adosso l'onda,
I lo sera
Soto tera
150I ghe fa zirar le grote
Dove el dì dorme la note;
E per gatoli e calete,