12Ma dove che la strada a passo a passo
Porta inclinando al pie de la colina
Vedè i putoti a trar l'acqua sul sasso,
Che deventa una lastra cristalina,
E con inzegno sbrissar zoso a basso,
Facendo sesti a Menega, a Catina,
Che ghe soride, e sta vardando atente,
E de no far l'istesso le se pente.
13Oh! come in mezzo a st'inocenti zoghi,
Come che scampa l'ore, o avanza bruna
La note in cielo! come in cento loghi
Fuma i camini, e l'aria più se imbruna!
Xe le famegie tute atorno ai foghi,
Quel missia la polenta, e quelo suna
Le fregole che casca, e tuti aspeta
De dar l'assalto a la più bela feta.
14L'ora e 'l silenzio al mio camin me chiama,
Dove me impizza el fogo la gastalda:
Più benigno calor, più bela fiama
Dei camineti de cità ne scalda:
Co do tre amici, e co chi el cuor me infiama,
Formemo un cerchio atorno, e sempre calda
Xe la conversazion, nè mai noiosa
Co gh'è dei amici, un fogo e la morosa.
15La maldicenza, o 'l perfido soriso,
Mai no ga cuor de comparirne avanti,
Ma ingenuità, amicizia e scherzo e riso,
Del rustico camin za solo amanti.
O vin recente che ve spruzza in viso,
O romatico, o dolce, a tuti quanti
Nina dispensa, e crostoli e pan fresco,
Maroni e pomi, e questo xe el rinfresco.
16La vila nel silenzio xe sepolta,
E solo in stala el pulierin se sente
Nitrir scorlando la criniera folta,
Che la vogia del fien rende impaziente,
Le zampe el sbate, e pur nissun l'ascolta,
Ma sbragia el can, credendo che sia zente,
E alora dal filò qualcun vien fora,
E quieta el can, e varda in cielo l'ora.
17Xe nei filò le done de la vila,
E i puti e le regazze unite insieme,
Al caldo de la stala ognuna fila,
E i puti a le regazze che ghe preme
Ghe fa roche e cesteli; ora ghe brila
Amor nel viso, ora i sospira e i zeme;
Istorie, o fiabe, le più vechie conta,
O dove la Versiera vive sconta.
18Fa sti filò che in mascara se rida
Co Nina mia, co Nina dal cuor belo,
Che ste regazze a cantuzzar la sfida;
Ma la luna, che brila in mezzo al cielo,
I nostri passi temerari invida
A l'aria averta disprezzando el gelo,
E al lume dei so ragi la belezza
Se contempla dei cieli e la grandezza:
19Ah! che stacarse l'ochio mio no possa,
No possa mai de contemplarve, o cieli!
Ghe xe teatri al mondo, ghe xe cossa,
Che sia come sè vu maestosi e beli?
Quel'anima brutal, che no vien scossa
A un spetacolo tal, coi pipistreli,
Coi tassi, co le talpe e le marmote,
Viva a palpon ne la più negra note.
20Vogia el destin che st'umile caseta,
Sti campi, e la mia Nina no me manchi;
Me sarà ogni stagion cara e dileta,
Che nassa i fiori, o che 'l teren se imbianchi,
L'istesso inverno, che spaventa e inquieta
Quei che vive in cità, co amor ai fianchi
De un nodo autor, che sto mio cuor no acusa,
Saludarà contenta la mia musa.
21Oh co quanta dolcezza i zorni e l'ore
Ne passa insieme! e l'ale amor ghe impresta,
Ne vede el sol, e 'l gode, e in mar el core,
Ma la note vien drio, la note resta:
Che se al to aspeto el nostro mondo more,
E xe natura scolorida e mesta;
Oh note dei amanti confidente,
Ti ne xe cara, e te godemo arente.
22Cara in quel'ore che lavora Nina,
E i bei dei sul laorier presti la move,
Co interompe el lavoro un'ochiadina
Che tuta dolce sin al sen ne piove,
E quando un'amorosa canzoncina,
In ton la canta, che 'l mio cuor comove,
E co amor sconto in la so bruna vesta
Ore più dolci ai nostri afeti impresta:
23Ore più dolci, e cresemae da un nodo
Tessuo da amor, ma che l'onor no sdegna,
Che durarà tra nu costante e sodo
Insin che morte a romperlo no vegna;
Sì, più che t'amo, o Nina, e più m'inodo,
E sempre più d'amor te trovo degna,
Nè xe a maravegiarse; amor t'à fato
Per far, col te cognosce, ognun beato.