Un contadin da un so compare è andà
A ricercarghe in prestio el so somaro
Per andar al marcà;
E l'altro dito ga: compare caro,
5Mi volentiera ve faria el piacer,
Ma con mio dispiacer
No ve posso servir, che a un mio vicin,
L'ò dovudo imprestar
Per andar al molin.
10In sto mentre mo l'aseno a ragiar
S'à messo a una maniera
Che à fato ben capir che in stala el gera.
Come ò da creder mai, compare mio,
El primo à replicà, co l'à sentio
15Mo l'aseno a ragiar, che veramente
Lo abiè imprestà a nissun, quando el se sente
Anzi adesso a ragiar? L'altro à sogionto:
O la sarave bela che in confronto
De l'aseno, compare, me metessi,
20E che piutosto a lu che a mi credessi!
No ocore replicar
A l'omo che servizio no vol far.
1Tre zoveni bizzari avea osservà
Che un furlan per garzon a un'osteria
Da pochi zorni gera stà impiegà,
E in testa gh'è vegnù sta bizzaria,
D'aspetar che 'l paron fusse lontan
Per far una burleta a sto furlan.
2Entrai ne l'osteria donca al garzon
I à dito, de voler lori disnar;
E lu li à ben servii con atenzion,
Perchè i avesse contenti da restar.
Infati à magnà questi a crepapanza
Senza, per cussì dir, che roba avanza.
3Portà po el conto, uno de lori a dito,
(Siben che 'l conto fusse assae indiscreto)
A sto garzon: ti n'à servio pulito,
E se vede de più che ti è discreto,
Donca è dover pagarte intieramente,
Anzi la bonaman donarte arente.
4E tolta in man la borsa à fato veder
Che l'avea dei zechini e dei ducati,
Disendo: amici, no vorè recreder
Che mi paga per tuti, perchè infati
Toca pagar a mi, mentre a disnar
L'altro zorno son stà senza pagar.
5Sior no, el secondo à dito, no convien,
Nè mai permetarò che vu paghè,
Gavè pagà altre volte, e no va ben
Che sempre a l'osteria ne superchiè.
El terzo francamente à po sogionto:
A mi toca a pagar, amici, el conto;
6O' magna a vostre spese i dì passai,
E dopo tante volte toca a mi.
El primo rispondea: no sarà mai;
E questionando i andava via cussì.
Infin quel altro à dito: la question
Decida donca, amici, sto garzon.
7E voltandose a lu: caro fradelo,
Fenissi ti sto afar; te bindaremo
Col fazzoleto i ochi, aciò, che quelo
Che ti ti chiaparà, mentre saremo
Intanto qua aspetando quieti e muti,
Abia elo solo da pagar per tuti.
8Persuaso el garzon, senza rifleter
A quel che podea nascer, e ch'è nato,
S'à lassa ai ochi el fazzoleto meter,
E mentre ch'elo andava via de fato
Cercando qua e de là chiapar qualcun,
Da l'osteria bel belo è scampà ognun.
9Xe arivà in quel mumento el so paron,
Che gnente no saveva de sto afar,
Urtando senza acorzerse el garzon,
El qual mo suponendo de chiapar
Un de quei tre, ga chiapà aponto lu,
Disendoghe: pagar ve toca a vu.
10O pofardio! credarò ben de sì,
Informà de la cossa, à dito l'osto,
Che pagar, sior minchion, me toca a mi.
Vostro dano, mi gavaria risposto:
No bisogna fidarse dei garzoni,
Ai negozi à da tender i paroni.
