Pagina:Rime in dialetto veneto di Polifemo Acca.djvu/24

Sta pagina la xe stà trascrita, ma la gà ancora da vegner rileta.
EL CURIOSO


     Smanioso de saver le novità,
Tuto quanto infogao, tuto suà,
Lo vedè batolar col portiner,
Col biavarol,1 col fante, col barbier;
E corer de galopo in farmacia,
In piazza, in Borsa, al molo e in pescaria:
Dal gran cafè dei Dindi al tribunal,
Dal magistrato al magazen del sal.
Se nasse un furto, un ciapa ciapa, un fogo,
Fra tuta la marmagia el se fa logo.
No se liga un rebel nè un farabuto,
No se mena un pitoco a istituto,
No se rebalta una mastela o un vaso,
No s’averze un canal senza el so naso;
E tuti quei fasioi che l'à ingrumà
El li va a semenar per la cità.

  1. Granajolo.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Rime_in_dialetto_veneto_di_Polifemo_Acca.djvu/24&oldid=71049"