Tonia. (Anca siora Cate m'à dito l'istesso; che fusse vero?)
Bort. Donca ve fideu?
Tonia (con affettata ritrosia). Mi dipendo da mia mare.
Bort. Anzola, toca dir a vu!
Anz. Lassème star, no i xe momenti da pensar a matrimoni questi.
Bort. Brava, ve par una bona razon, parchè gavè un fio desgrazià, de voler preçipitar anca la puta?
Anz. Eh, va là Tonia, che ti xe anca tropo zovene e partii no te ne mancarà.
Tonia. Casse! a sentirla ela so ancora crua.
Bort. Sior'Anzola, la me bada a mi, la se quieta e la me responda.
Anz. Ben parlaremo, parlaremo, adesso no go testa.
Tonia. Cossa importa de la testa, par parlar se dopara la boca!
Bort. Da resto, saveu cossa che v'ò da dir? che se vu volè butar drio el manego e la manèra, sè parona, che mi so vegnuo da vu par rimediar ai mii torti, e che go avudo anca tropa pazienza. Se no volè Pasqualin, mi no me ne importa un figo. A l'onor de vostra fia dovè pensarghe vu, e se doman tuti slenguassarà sul conto suo, mi par mi, me ne lavarò le man.
Tonia (spaventata). No, sior Bortolo, se anca mia mare no lo vol, Pasqualin lo vogio mi!
Bort. Mi vago via.
Tonia. E mi vago a negarme.
Anz. No, Tonia. No, sior Bortolo. Par carità el me compatissa, go el cuor cussì ingropà, che no so più quelo che me diga.
