Emma. Dasseno? dove xeli?
Giov. Là in quela carta. Andrea m'à dito che forse stasera ti saressi andada al Circolo anca ti. No Xe vero?
Emma. Marcelo voria condurme, ma mi no sò deciderme.
Giov. Percossa?... contentilo. I marii xe megio contentarli. Una volta no ghe saria stà sto pericolo.
Ter. Xe quelo che diseva anca mi. Ma ela, se la savesse, la pensa che l'ultima volta che la xe andada, xe stà col so Stefano... e ghe fa malinconia.
Giov. Eh! se se dovesse andar adrio a ste robe! Co se xe zoveni, bisogna darse coragio. Pur tropo co se xe veci come nualtri, no ghe xe caso. Se resta copài...
Emma. Ben... in ogni modo mi la ringrazio.
Giov. Va là, no importa che ti me ringrazi. Stamatina so andada dal fiorista, giusto a veder de una corona per quela povareta, e cussì me li son fati meter sora el conto.
Emma. Se la permete, vado a meterli in fresca.
Ter. Sì, va là, e cussì dighe a la Rosa che la ghe porta un cafè. (Emma via).
Giov. In verità sala che la trovo proprio benin...
Ter. Ghe par sì? Fin che la dura!
Giov. Sento dir da tuti...
Ter. Oh sì, per quelo saria un'ingrata se no disesse anca mi che megio no'l podaria esser; perchè lu no'l va mai fora de casa, perchè lu fa una vita come un vecio, tolto che qualche volta el xe un poco de malumor.
Giov. Oh per quelo ghe vol altro! I omeni bisogna compatirli.
