Ter. Xe la racomandazion che ghe fasso sempre a l'Ema.
Giov. Ma za! perchè se no, se ghe fa star zo l'animal... ma ela per quanto che se ghe lo disesse, no ghe gera caso... No posso! e co' quelo la façeva quelo che la voleva.
Ter. La gera de quele nature che co le se buta per tera no le xe più bone de tirarse suso.
Giov. Ma proprio benedeta! in quelo la podeva dir de somegiarghe a so pare, sì!
Ter. E a proposito. Come vala de quel povero Daniel?
Giov. Conie vorla che la vada? Sempre l'istesso.
Ter. Dasseno? E sì me par che col tempo el gavaria dovuto adatarse un poco...
Giov. Xe quelo che sperava, ma capisso che quando no se ga la forza de superarse, gnanca el tempo no basta... e cussì l'andarà sempre pezo! el me farà sempre più combater.
Ter. Ma andemo! No la diga de ste robe... la pensa piutosto, che data la so età, el podaria esser in pezo condizion...
Giov. Sì, sì, per quelo no me lagno... Ma la testa, benedeta? la testa?
Ter. Bisogna compatirlo, se capisse che lu ghe fila suso, ma d'altronde bisogna convegnir che xe un gran toco, sala, che quel'omo xe un poco incocalìo.
Giov. La diga pur da quando che l'è nato. Ma come adesso no l'ò mai visto... perchè lu xe come insulso, come sempioldeto... Basta che ghe diga che lu una volta cussì esato, che no ghe gera pericolo che no'l me dasse sempre tuto... ben, adesso co'l
