me porta a casa i soldi, vorla che ghe lo diga? ghe manca sempre qualche franco.
Ter. Ma varda cossa che pol far el dolor!
Giov. Ma proprio! perchè de le volte, Dio difenda, par fin...
Ter. La tasa, la tasa, che me par che i fassa le scale.
And. Se pol?
Teresa. Avanti, avanti! Xelo lu, Andrea?
And. Sì, son vegnudo a dirghe che Marcelo intardigarà un poco a vegnir a casa, perchè el ga dovudo andar un momento in studio da un so amigo. Ah! la xe qua anca ela, siora Giovana? Come stala? stala ben?
Giov. Cussì, no ghe xe mal.
And. Gera un toco, sala, che no se vedevimo...
Giov. Ma benedeto! no vegnì mai da quele parte..
And. Sì, la ga razon. Anca Daniel ancùo m'à dito ch'el vol che vada a saludarlo.
Giov. Chi?... Daniel? El lo ga visto?
And. Sì, lo go trovà adesso, che l'andava a casa.
Giov. Oh Madona benedeta, bisogna che cora! perchè se lu el va a casa e che no'l me trova, el se mete subito in passion.
Ter. Andèmo, via, no la se afana, che adesso l'andarà.
Giov. Me dispiase de no saludar gnanca l'Ema...
