Per l'album de la regazza Eleonora
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← Letera a Teresa | Edission e fonte ▼ | Per l'ingresso del paroco → |
De Giove al tribunal
Capita un memorial
De bon ingiostro scrito
Da un numero infinito,
5Che co i s'à maridà,
Pensando saviamente,
Come che veramente
Va pensà,
I ga cercà una dona
10E brava, e bela, e bona,
Ma che da Amor ze stai
Per un conto o per l'altro minchionai.
Giove ben informà
Che le ze verità,
15Che no gh'è impianti,
Amor chiama davanti,
E con quatro parole, ma de quele
Da portar via la pele,
Che dà una gran salata
20Disendoghe cussì, che co se trata
Servir a un omo onesto, che procura
De torse per compagna
Una creatura
Col fisico e 'l moral senza magagna,
25Bisogna contentarlo,
No se deve inganarlo,
Minaciandolo de la dimission
A la prima ocasion,
Che 'l preceto presente
30No l'avesse osservà precisamente.
Amor che ga criterio,
Capindo che l'afar
Podeva deventar
Piutosto serio,
35E che non adempindo sto preceto
El meteva in pericolo el paneto,
Dopo aver ben pensà
Che presenta una istanza
Disendoghe: — maestà,
40Aciò la mia ignoranza
El mio scarso talento
No fassa che cometa
Un mancamento,
La prego, la permeta.
45Che vegna a suplicar
De voler darme
Un preciso esemplar
Da regolarme —
Apena al protocolo capitada
50Giove l'à esaminada,
E po ipso facto,
Giudizioso quel dio,
Ghe l'à mandada indrio
Co sto atergato:
55— Perchè no possa Amor trovar obieto
De incontrar a puntin quando che ocore
El Nostro irevocabile decreto,
Per modelo ghe demo la Eleonora,
Dove secondo Nu
60Gh'è bonta, gh'è belezza e gh'è virtù.